Act 28 | WSK | STEP | Ana yawarakala arataman, mu ana tual mu ko nup Malta mu ana ikiman.

Acts 28

Malta tual te

1 Ana yawarakala arataman, mu ana tual mu ko nup Malta mu ana ikiman. 2 Tual mu ko kariimet mu ana nogo ko yawarakala bitakasan. Tuwik kapakaso ale sor ipi biya, se nuna tama uwiman ale nanga giman nangarak nama tama duap te nanga awuman.

3 Paul tam sang giam ale tama awete awuwaram se urer tama kowar iluwam se aratam, ale kore te Paul kuting usikuawuram. 4 Se tual kariimet urer Paul kuting te kekawaram se aringiman, ale nunumi manarukasan, “Kari imi mu kari bo moram se kueram agila pa!” makasan. “Nu gagi ningi wore yawarakala aratam. Bare nu kari memek se anananga wit mairap yam ariwomon se marak me bagurukko, momon se kuerukko.”

5 Bare Paul urer sisupuram se nama tama ningi dagulam, se nu memek bo me tam. ^{▼▼Acts 28:5 Ma urer olekem alo me nunga maguwumonko: Mark 16:18.} 6 Se kariimet kuting laguruk agi, tairate dagulok kueruk wore ko kimi tuikasan. Ale nuna nu kam maiya biya kimi tui lagakasan, bare memek bo nu kumik te aratam se me aringiman. Ale nuna nunga ikia guruguman ale balman, “Imi kaem bo agila pa!” maman.

7 Sor mu ko pingita mu tual mu ko kari biya Publius ko ali sor. Nu yawarakala nanga giam nangarak ko kawam te namaram, se ana tom ilagala suwan nu ilak bagakasan. 8 Noko nuet mu kuera ago, kumik karakaso ale nukum yu namakaso, se ko kuwim te aniwakaso. Se Paul ko kuwim te aniwara mu ningi kasu naguram ale ngatangaram, ale kuting kumik te beteram se kumik nungeram. 9 Nu uwuta beteram se aringiman ale tual mu te suen la kuera ikes ago mu taikasan se nunga nungurukaso. 10 Nuna munan suen biya te yawarakala nanga bitakasan. Ale tom ana namanakko negeman, mu mel tutuk suen biya ana ko tukunang aman mu ago tai bolala awu nangarman.

Malta nama Rome

11 Ana sige ilagala suwan Malta bagakasan. Ale baga dal bo te aragaman. Dal umu mu tom daula biya mu te tual umutang te bagakaso. Mu Alexandria wonong nunga dal. Ko dun gira mu te kaem Zeus ko kuriang ilagala singisik mu nunga nodora tam te kisi awuman se anikaso. Se ana arataman namakasan. 12 Ana nama Syracuse naguman, ale tom ilagala suwan umu te bagaman. ^{▼▼Acts 28:12 Malta nama Syracuse mu 120 km iwita. Syracuse mu Sicily tual biya mu ko koma east mu te.} 13 Umu te arataman mu nama Rhegium arataman. Ale ukiram se daula koma south mu te taikaso, se ana nama animan ukiram mu Puteoli arataman. ^{▼▼Acts 28:13 Map ago arikko. Rhegium mu Italy sor te koma south mu te. Puteoli mu Rome ko pingita.} 14 Asele umu te dal beteman ale Kris alo sang nungarkaman. Se balman se ana tom 7 ko arungu umu te bagakasan. Asele nadeleng te Rome namakasan.

15 Se Rome Kris alo mu ana taikasan mu ko den ikiman, ale nangarkomonko sor Appius ko Diara Kuwim se Daup Kawam Ilagala Suwan umutang te taiman. Se Paul nuna nungarkam mu nu Kaem nup patowaram ale gomang auram.

16 Tom ana Rome nama arataman, mu Rome kari bibiya balman se Paul kota kawam bo te bagakaso, se kager kari bo nu bituokko balman se ilak bagakaso.

Paul Rome wonong te den apukaso

17 Tom ilagala suwan namaram se Paul Juda supuling alo nunga auram se tai bolala awuman. Se nunga maonam, “Aga singsang, ani nanga kariimet nunga maguwurikko munan bo me beterem. Ale nanga taleng girigir alo nunga munan mu betela me maguwurem. Bare ani Jerusalem ningi aga talipaman, ale Rome nuguting te aga beteman. 18 Se Rome kari bibiya aninga den aringiman, mu nuna ani memek ito ko aga momon se kuerikko mu me aringiman, ale nuna yam aga betemon se namirikko. 19 Bare Juda alo miakasan, se ani aguwaya maikko mena, se ani Caesar aga den arigokko balem.

“Bare aninga kariimet mel bo ko den ningi me nunga bitakasam. 20 Umutang ko ani nina ningarkik ale nengerak munakirikko balem. Ani Israel alo Kari ko kimi bitawasan borta tairam se ani ko angamang ningi nunguning aram se umutang ko mayang imi ani angimik te aniso.” ^{▼▼Acts 28:20 Kariimet kueman mu aking barasomonko, Jesus beteram butata: Acts 24:15; 26:6.}

21 Se nuna nu manorman, “Ana Judea sor te tam gawa bo me tokasan. Ale Juda bo taikaso ale den sang nanga manaru se ni ko ko den memek sang me balukaso. 22 Bare ana ni keta kiring te ka ikia balu se ikinakko. Mu awuk, ana ikisan, ana Juda alo nanga ningi motam iru bo aratam, se kariimet sor suen biya te mu nunga balu maguwusan. Se aitak ni keta kiring te den ikinakko nangamang aniso.”

23 Ale nuna Paul ilak tom bo balu gilingiman, ale tom umu te kariimet suen biya nunguningkiri kawam Paul te bagaram mu te tai gilingiman. Se tumongola nama bainga ningi Paul Kaem ko kingdom ko balu se ko duap apukaso. Ale nuna te Jesus ko nongomang ningi nunguning arukko Moses ko batoga te, se prophet alo nunga batoga te den sang nunga manarukaso.

24 Se kariimet sang noko den ko nongomang ningi nunguning aram, bare kariimet saki mu mena. 25 Se nongomang suwanta mena pila pila namakasan. Bare Paul giram ale den bo iwita nunga maonam, “Korang Bur diram Isaiah kuring te ninga girigir alo nunga maonam. 26 Nu iwita balam,

‘Namar ale kariimet sumu iwita nunga manaruko:
Nina den iki lagaral, bare ninguru me ko ikialkowo.
Nina loaga lagaral, bare me arigalkowo.'
27 Mu awuk, kariimet sumu nongomang motam aora biya.
Se den ikimon bore ko nodogowa bagu muruwuman,
ale nomotam kuiniman.
Uwuta mena mu nomotam te aringimon,
ale nodogowa te ikimon,
ale nungamin kiti uriok,
se giris palagomon se ani nunga nungekko.’ ^{▼▼Acts 28:26-27 Isaiah 6:9-10.}
28 “Korang Bur butata ninga munan ikiam ale balam. Buta se nina te ikialko balsam, Kaem nu kariimet nunga giokko mu ko den yawara mu sor saki ko kariimet ikimonko beteram se namaram. Nuna ikimonkowo!” 29 ^{▼▼Acts 28:29 Batoga saki girakala batagorman mu te den imi ago aniso: “Se Paul den imi balam mu Juda alo nongota nongota den te nunumi ilu se namakasan.”}

30 Yar ilagala ko Paul kawam umu te la baga se kawam diakaso. Ale kariimet kote taikasan mu nu suen la munan ningo la nungumik te bitakaso. Nu sokel ago Kaem ko kingdom ko den balukaso, ale Kari Biya Jesus Kristus ko dugu duap biyala nunga manarukaso. Se kari bo nu koma me kalokaso.

31